एमालेले मधेस केन्द्रित चुनावी अभियानमा

काठमाडौं, श्रावण ५ - एमालेले मधेस केन्द्रित चुनावी अभियान सञ्चालन गर्ने भएको छ ।

पार्टी मुख्यालय बल्खुमा जारी केन्द्रीय समिति बैठकले मधेस केन्द्रित चुनावी अभियान सञ्चालन गर्ने अध्यक्ष झलनाथ खनालको प्रस्ताव पारित गरेको छ । २०७० मंसिर ४ गतेका लागि निर्धारित संविधानसभाको निर्वाचन सुनिश्चित गर्न र एमालेलाई पहिलो पार्टी बनाउन एमालेले एकीकृत तथा केन्द्रिकृत योजनाका साथ पार्टीशक्तिलाई परिचालन गर्ने भएको छ ।
एमालेले 'तराई-मधेस अभियान- २०७०' सञ्चालन गर्ने, निर्वाचन क्षेत्र पुनः निर्धारण गर्दा अन्तरिम संविधान- २०६३ को व्यवस्था अनुरुप हुनुपर्ने, संविधानसभामा ३३ प्रतिशत महिला र १० प्रतिशत श्रमिक सहभागिता सुनिश्चित गर्न सक्रिय पहलकदमी लिने, निर्वाचन परिचालन कमिटी, घोषणा पत्र मस्यौदा कमिटी, उम्मेदवार छनोटको प्रकृया निर्धारण लगायत संविधानसभासँग सम्बन्धित बिषयहरुमा गृहकार्य गर्न स्थायी कमिटीलाई जिम्मेवारी दिने निर्णय गरेको छ ।

एमालेले संविधानसभा निर्वाचनको तयारीको लागि भदौ तेश्रो साता वृहत राष्ट्रिय कार्यकर्ता भेला आयोजना गर्ने, संविधानसभा निर्वाचनको लगत्तै पछि पार्टी विधानमा संशोधनका लागि राष्ट्रिय प्रतिनिधि परिषदको बैठक आयोजना गर्ने र राष्ट्रिय प्रतिनिधि परिषदको बैठक पछि पार्टी विधानले निर्धारण गरेको समय सीमा २०७० फागुन महिनाभित्र पार्टीको नवौं राष्ट्रिय महाधिवेशन सम्पन्न गर्ने निर्णय गरेको छ ।