प्रधानमन्त्रीसँग सिधै बार्ता गर्न देउवालाई एमाले सचिव भट्टराईको सुझाव

एमाले सचिव योगेश भट्टराईले सरकारको बिषयमा अरु दलसँग कानेखुसी गर्न छाडेर सिधै प्रधानमन्त्रीसँग बार्ता गर्न कांग्रेस नेतृत्वलाई सुझाव दिएका छन । कांग्रेस सभापति शेरबहादुर देउवाले सरकारको बिषयमा के गर्ने भन्दै अन्य दलसँग भन्दा सिधै प्रधानमन्त्रीसँग कुरा गरी सरकारमा सहभागी हुनु उपयुक्त भएको भट्टराईको सुझाव छ ।
‘कांग्रेस सभापतिले सरकारको बिषयमा के गर्ने भनेर छड्के आँखा लगाइ साना दलसँग कुरा गर्नु भन्दा प्रधानमन्त्रीसँग सिधै वार्ता गर्नाेस,’ बिहीवार आयोजित प्रेस चौतारी नेपाल, रासस शाखाको दोस्रो अधिवेशन तथा पुरस्कार वितरण कार्यक्रममा भट्टराईले भने ।

प्रेस चौतारीका नेपालका अध्यक्ष राजेन्द्र अर्यालले राससलाई सार्कस्तरको समाचार संस्था र सूचना बैंकका रुपमा रुपान्तरण गर्नुपर्ने बताउँदै श्रमजीवी पत्रकार ऐनको कार्यान्वयन सरकारी सञ्चारमाध्यमबाटै हुनुपर्नेमा जोड दिएका थिए । कार्यक्रममा राससका नायब महाप्रबन्धक तथा सञ्चालक समिति सदस्य सुरेन्द्रबहादुर नेपालीलाई सम्मान र महोत्तरी (बर्दिवास) समाचारदाता गोपालप्रसाद बराललाई पुरस्कृत गरिएको थियो । पुरस्कारको राशि पाँच हजार रुपैया रहेको छ ।
अध्यक्षमा गौतम
अधिवेशनले प्रेस चौतारी नेपाल रासस शाखाको अध्यक्षमा कृष्णराज गौतमलाई सर्वसम्मत चयन गरेको छ । यसैगरी उपाध्यक्षमा तिलक भुसाल, सचिवमा अभिलाषा पोखरेल र कोषाध्यक्षमा शर्मिला पाठक तथा सदस्यहरुमा मुना भण्डारी र कमला पौडेल सर्वसम्मत रुपमा निर्वाचित भएका छन । यस्तै श्याम रिमाल र कालिका खडकालाई केन्द्रीय प्रतिनिधि चयन गरेको छ ।