काठमाडौं, ८ पुस
एमाले अध्यक्ष केपी शर्मा ओलीले एकीकृत नेकपा माओवादीले संबिधान जारी गर्न अवरोध गरिरहे पनि तोकिएको ८ माघमै नयाँ संबिधान आउने उदघोष गरेका छन । मुलुक संबिधानबिहीन अवस्थामा रहन नसक्ने भन्दै ओलीले संबिधानसभाले तय गरेको कार्यतालिका अनुसार नै आगामी ८ माघमा नयाँ संबिधान आउने ठोकुवा गरेका हुन ।
‘ढुक्क हुनुहोस, तोकिएको ८ माघमै संबिधान आउँछ, त्यसैका लागि एमाले प्रतिवद्ध छ, संबिधान ल्याउन लागेका हाम्रा अन्य सहयात्री दलहरू पनि त्यसै दिशामा केन्द्रित छन,’ प्रेस चौतारी नेपालले मंगलवार आयोजना गरेको अन्तर सम्वादमा एमाले अध्यक्ष ओलीले भने । उनले एकीकृत नेकपा माओवादी जसरी पनि संबिधान आउन नदिने षडयन्त्रमा लागे पनि अव कामयावी नहुने जिकिर गरे । ‘सहमतिका साथ ८ माघमा संबिधान बनाऔं भन्दा बुरुक्क उफ्रेर फेरि संबिधान बनाउने कुरा गर्ने भन्दै भाग्ने एमाओवादीको शैली रहे पनि ८ माघमै संबिधान आउँछ, उनीहरू सुध्रिएर मुलुकको हित अनुकुलको सहमतिमा आउछन,’ ओलीले भने ।
ओलीले सहमतिको आधार राष्ट्रघात भने हुनै नसक्ने बटमलाइन समेत सुनाए । राष्ट्रको अहित हुने गरी कुनै पनि सम्झौता हुन नसक्ने भन्दै ओलीले सहमतिका नाममा राष्ट्रघाती काम आफूहरूले नगर्ने प्रष्ट पारे । ‘देश, जनता, लोकतन्त्र, राष्ट्रिय एकता, विकास र लोकतान्त्रिक सपना बिरुद्ध कुनै पनि सहमति हुँदैन, सहमतिका लागि उचित कुरा ल्याउनु पर्छ,’ ओलीले भने । ओलीले ८ माघमै संविधान जारी हुने स्पष्ट पार्दै आफुहरुले सहमतिको अधिकतम प्रयाश गर्ने जानकारी पनि दिए । ‘सहमति भएन भने अन्तरिम संविधानले ब्यबस्था गरे बमोजिम प्रक्रियामा गएर भएपनि संविधान जारी हुन्छ,’ ओलीले भने ।
सहमति र प्रक्रिया दुवैमा नआए एमाओवादी लगायतका दलहरुको गम्भीर भुल हुने चेतावनी पनि उनले दिए । ‘समय र ज्वालामुखीले कसैलाई पनि पर्खदैन, संबिधान निर्माणको सवालमा पनि यस्तै हो, जो आउँदैनन, उनीहरु छुटछन,’ ओलीले भने । उनले एमालेले सहमतिको प्रयाश गरिरहेको भएपनि एमाओवादीले आन्दोलनकारी मोर्चा बनाएर संविधान जारी गर्ने प्रक्रिया अवरुद्ध गर्न खोजेको आरोप लगाए । आफु मुलुकको असली पहरेदार भएकोले सदैव मुलुकको हितमा काम गर्ने भन्दै ओलीले आफूलाई राष्ट्रघात गर्न कसैले पनि बाध्य पार्न नसक्ने चेतावनी दिए । आफु मुलुकको पहरेदार भएकै कारण सहमति गरेर जाउँ, मिलेर जाउँ भन्ने कुरा पटक पटक गरेको भन्दै उनले भने ‘ल मिलेर जाऊँ भनेको त बाहिर गएर भनेछन ‘केपी ओली राजा महाराजा हो र ?’
राजा महाराजाहरूबिरुद्ध बिगतमा लड्दै आएको भन्दै ओलीले आफुले राजा महाराजा हुने सपना नदेखेको प्रष्ट पारे । ‘राजा महाराजाबिरुद्ध लडियो, राजा महाराजा बन्न खोज्नेहरूको सपना पनि कहिल्यै पूरा हुन दिंदैनौ,’ ओलीले भने । बालुवाटार बैठकमा सहमतिका साथ ८ माघमै संबिधान जारी गरौं भन्दा एमाओवादी त्यो हुन सक्दैन, फेरि संबिधान जारी गर्ने कुरा कहाँबाट आयो भन्दै हिडेको जिकिर पनि ओलीले गरे । ‘पाउरोटी पनि खस्रो हुन्छ भनेर बटर लगाइ लगाई मैले कुरा राखें, तर सहमतिका साथ ८ माघमा संबिधान जारी गर्नूपर्छ भन्न साथ यो कसरी हुन्छ, फेरि उही ८ माघमै संबिधान जारी गरौं भन्ने ? भन्दै उफ्रिएर हिडे,’ ओलीले भने, बाहिर गएर त नाटक नै देखाएछन, यस्तो नाटक मन्डली त अहिलेसम्म देखेकै थिईंन ।’
भौगोलिक अखण्डता र जातीय बिद्वेश फैलाउने खालका कुनै पनि विषयमा सहमति नहुने पनि प्रष्ट अडान थियो । ‘संविधान नबन्दै त केही केहीले बिखण्डनकै कुरा गरेका छन् भने संविधानमै त्यो कुरा लेखिदिएपछि के होला ?’ उनले प्रश्न गरे । जातको आधारमा राज्य निर्माण नहुने स्पष्ट पार्दै ओलीले जातकै आधारमा राज्य बनाउन खोज्दा रुवाण्डा ध्वस्त भएको उदहारण दिए । केही ब्यक्तिहरूले तराइमा पहाड छुवाउनै नहुने कुरा गरिरहेको भन्दै ओलीले आम तराइवासी नागरिकको चाहना त्यसो नभएको स्पष्ट पारे ।
राजनितीमा सहमतिको प्रयाश पहिलो भएपनि सहमति सम्भव नभएमा प्रकृयावाटै सबै कुरा हुने भन्दै संविधान जारी गर्दा पनि कसैलाइ कुर्न नसकिने ओलीको भनाई थियो । ‘संविधान निर्माणमा कोही छुट्यो भने कुर्न सकिदैन,’ ओलीले भने । ओलीले मुलुकलाई फेरि हिंसातर्फको यात्रामा लाने गरी कुनै सहमति नहुने अडान पनि राखे ।
